Rusiye kontrolindeki Aqmescitniñ Kiyev rayon mahkemesi «qırımlı musulmanlar davasınıñ» dördünci Canköy gruppa mabüsleriniñ apis müddetini 2025 senesi oktâbr ayına qadar uzattı, dep haber ete «Qırım birdemligi» cemaat birleşmesi.
Santehnik Rustem Mustafayev, işçi Abibulla Smedlâyev, Rusiyede mahküm etilgen Remzi Kurtnezirovnıñ oğlu Emir Kurtnezirov, iş adamı ve aşçı Mirzali Tajibayev Rusiye uquq qoruyıcıları ttarafından Rusiyede yasaqlanğan, amma bir çoq memlekette serbest faaliyet köstergen «Hizb ut-Tahrir» islâm siyasiy firqasınıñ faaliyetinde iştirak etkeninde qabaatlanıp tutuldı.
«Tahqiqatçı bu muracaatını (apiste qaluv müddetini uzatuv) tahqiqat areketleri bitmedi, keçirilecek tedbirler bar, dep añlattı – (qabaatlanğanlar) ekspertizalar, dava malümatınen tanışmalı ve bu cinaiy dava bitmeli», – dep ayttı Qırım birdemligine» advokat Edem Semedlâyev.
Tahqiqatçı qırımlılar «tahqiqattan saqalana ve şaatlarğa tesir ete bile dep», SİZOda qalmalarını talap etti.
Qabaatlanğanlar ve imayecileri apis müddetleriniñ uzatılmasına itiraz bildirip, apiske alınğanlarnıñ bütün içtimaiy bağları Qırımda, dep qayd etken edi.
«Bir yerge ketecegi, birisine tesir etecegi ve böyle etip tahqiqatqa mania olacağı yoq edi ve yoq», – dep qoştı advokat Semedlâyev.
Fevralniñ 5-nde saba işğal etilgen Qırımnıñ Canköy ve İslâm Terek rayonlarında tintüvler keçirildi, beş qırımtatarınıñ tutulğanı belli oldı. Apiske alınğanlar arasında – imam Remzi Kurtnezirovnıñ oğlu Emir, çağına yetmegen dört balanıñ babası Abibulla Smetlâyev, santehnik Rustem Mustafayev, Mırzaali Tacıbayev ve Bahtiyar Ablayev.
FSB hadimleri episini Aqmescitke tahqiqat tedbirleri içün alıp ketti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.