«Qırımlı musulmanlar davasınıñ» mabüsi Zaur Abdullayevniñ Rusiye apishanesinde ciddiy sağlıq problemleri bar: tek 12 tişi qaldı. Bu aqta Qırımtatar Resurs Merkezi apayı Emine Abdullayevanıñ malümatına esaslanıp haber ete.
«Sağlıq problemleri bar. Aytqanına köre, tek 12 tişi qaldı – qalğanları ya töküldi, ya da ağırğanda çıqarıldı. Anda tiş yardımı kösterilmey, ebet. Tişiñ ağırsa – tiş ekimine yollaylar, o, ise tek çıqarmağa teklif ete», – dep tarif etti o.
Tiş problemlerinden ğayrı, Zaurnıñ hronik hastalıqları kerginleşti – şeker hastalığı ve arterial gipertenziya.
«Şeker içün ilâc ala. Alsa, er şey bir qarar, şekeri çıqmay. Ayağında bir şey çıqtı – ne yapacağımıznı bilmeymiz», – dep qoştı o.
Ömür arqadaşınıñ aytqanına köre, şimdi Zaurğa fizik basqı yapılmay, lâkin maneviy vaziyeti yahşı degil. «Maneviy ceetten bu episi tesir ete», – dep qayd etti Abdullayeva.
2021 senesi avgusinıñ 17-nde Rusiye uquq qoruyıcıları beş qırımtatarı Cebbar Bekirov, Zaur Abdullayev, Rustem Tairov, Raif Fevziyev ve Rustem Murasovnıñ evlerini tintti. Bütün faaller tutulğan edi.
Rusiye mahkemesi Bekirovnı 17 yıl sert rejimli koloniyada qalmasına üküm etti. Diger mabüsler, şu cümleden Zaur Abdullayev, «Hizb ut-Tahrir davası» boyunca 12 yılğa üküm etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
