«Serbest Qırımğa mektüpler» teşebbüsi çerçivesinde yırcı Valeriy Harçışın Rusiye akimiyeti tarafından 13 yılğa üküm etilgen qırımtatar faali Aziz Ahtemovnıñ mektübini oqudı. Bu aqta Ukrayina prezidentiniñ Qırım Muhtar Cumhuriyetindeki temsilciligi haber ete.
«Al-azırda Aziz Ahtemov Altay ülkesiniñ Rubtsovsk şeerindeki №10 tüzetüv koloniyasında cezasını çeke. Siyasiy mabüsniñ aşı, açıq avada kezmesi pek sıñırlana ve qorantasınen bağı yoq. Halqara toplulıq, hususan aq qorçalayıcı teşkilâtlar, Avropa Birligi ve ABD bu davanı siyasiy sebepli dep tanıdılar», – dep aytıla haberde.
«Serbest Qırımğa mektüpler» aktsiyası 2023 senesi aprel ayında başladı. Onıñ maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek. Bundan ğayrı, mektüpler Rusiye apishaneleriniñ memuriyetleri içün bir işaret ola, er bir Ukrayina vatandaşı müim, cemiyet ise tutuv şaraitlerini közete, dep köstere.
2022 senesi sentâbrniñ 21-nde Rusiye kontrolindeki Qırım Yuqarı mahkemesi Anğara köyünde gaz borusında diversiya davası boyunca üküm çıqardı. Asan Ahtemov 15 yıl sert rejimli koloniyada qalmasına üküm etildi, 500 biñ ruble para cezasını aldı ve 1 yıl azatlıqtan marum etildi. Aziz Ahtemov 13 yıl sert rejimli koloniyada qalmasına üküm etildi, 500 biñ ruble para cezası ve 1 yıl azatlıq sıñırlaması berildi.
Oktâbrniñ 2-nde Nariman Celâl ve ağa-qardaşlar Aziz ve Asan Ahtemovlarnı Aqmescitteki 2-nci SİZO-dan çıqarıp, Rusiye apishanelerine etap ettiler.
2023 senesi noyabr ayında Aziz Ahtemov Qırımdan Rusiye Federatsiyasınıñ Krasnoyarsk vilâyetindeki 2-nci Yeniseysk apishanesine 40 künge qadar etap etilgenini bildirgen ediler.
2023 senesi sentâbrniñ 17-nde Aziz Ahtemovnıñ ömür arqadaşı, onı Rusiyeniñ Krasnoyarsk vilâyetindeki Yeniseysk şeerindeki apishaneden belli olmağan yönelişte etap etkenlerini bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
