Tirenüv timsalleri – Ukrayina timsallerinen stiker, şerit ve yazuvlı şiarlar – Aqmescit, Aqyar ve Yaltada peyda oldı. «Sarı şerit» faalleri olarnı soqaq, ev kirişleri, duraq ve insanlar keçken yerlerde yerleştirdi, dep haber ete areketniñ Telegram kanalında.
«İşğalcilerniñ bu timsallerni alıp taşlamaq ıntıluvları faallerniñ tirenüvni devam ettirmek qararlığını quvetleştire. Yerli sakinler işğalniñ bitmesini bekley, çünki Qırım Ukrayina ola», – dep aytıla haberde.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
