Rusiye kontrolindeki Cenübiy okrugınıñ arbiy mahkemesi "Hizb ut-Tahrir davasınıñ" altıncı Bağçasaray gruppası davasınıñ iştirakçilerine sıñırlav tedbirini uzattı, dep bildirdi "Qırım birdemliginiñ" advokatı Emil Kurbedinov.
Faaller Memet Lümanov, Mustafa Abduramanov, vatandaş jurnalistleri Rustem Osmanov ve Aziz Azizov eñ azından 2025 senesi orta küz ayınıñ 7-ne qadar apiste qalacaqlar.
Kurbedinovnıñ aytqanına köre, Rusiye qabaatlayıcısı sıñırlav tedbiriniñ uzatılmasını adiy delillernen izaatladı: qabaatlanğanlar saqlana bile, şaatlarğa tesir ete bile ya da qanunsız faaliyetini devam ete bile.
İmaye tarafı, müvekkiller tarafından böyle areketler yapılğanına dair iç bir delil olmağanını qayd etip, itiraz bildirdi.
"Qabaatlav tarafı, mabüsler ne içün ev apsinde tutulmay, dep añlatıp olamay. Bu azatlıq degil de, aynı böyle bir serbestlik sıñırlavıdır", — dep qayd etti Kurbedinov.
Nevbetteki mahkeme oturışı o 28-ne planlaştırıla.
2024 senesi saban ayınıñ 5-nde saba Qırımda qırımtatarlarnıñ evlerinde kütleviy tintüvler keçti. Bağçasarayda taqiqat tedbirleri "Qırım birdemliginiñ" faallerinde, Canköy rayonında ise diniy erbaplarda keçirildi. Umumen 10 qırımtatarınıñ evinde tintüvler keçirildi.
Tintüvlerden soñ FSB eñ azından beş insannı tuttı, olarnıñ arasında sabıq imam Remzi Kurtnezirov bar edi. O, ekinci sınıf saqatı.
Rusiye quvetçileri saban ayınıñ 5-nde tutulğan qırımtatarlarnı terroristik teşkilâtta iştirak etüvde qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
